E mendova më të lehtë shkrimin e kësaj përshëndetjë në këtë përvjetor të revistës por ja që s’qënka kështu. Sepse sapo u mundova të vë gishtat në tasierë, m’u desh të ndaloj e të kujtoj tërë rrugën e përshkuar, në këta vite.
Jeta e një reviste është si jeta e njeriut. Ka ditët e saj të bukura e ditët e mërzitshme. Brenda saj ka mijera faqe, që thonë mijëra gjëra, ngjarje që shpalosim ndjenja e mendime.
14 vjet revistë nuk janë shumë por nuk janë edhe pak. Filloi me atë entusiazmin siç fillojnë tërë punët e më pas rutina e përditshme veproi por nuk mundi të më mposhtë.
Ndër vite kam punuar me stafe të ndryshme ku padyshim secili ka sjellë frymën dhe nivelin e tij dhe kjo shihet po të shfletosh revistat ndër vite. Ajo që më jep kënaqësi është se kjo krijesë e brishtë, u rrit u ripërtëri dhe vazhdon të jetë mes nesh e do të vazhdojë deri sa të ketë krijues që kanë diçka të bukur për të thënë.
E ndjej se do të bëja gabim nëse në këtë përvjetor do të veçoja emra, pasi të gjithë ato që kanë sjellë krijimet e tyre në faqet e kësaj reviste janë për mua miqtë e mi më të mirë.
Nuk jam këtu për të caktuar hierarki vlerash por pa modesti mund të them se niveli i revistës ka ardhur gjithnjë duke u rritur.
Vazhdimësia e revistës është padyshim njëra nga anët e forta të saj.
Në kushtet e krizës mbajtja e një reviste është një luks. Për këtë një ndihmesë ka Shtëpia Botuese “ADA” dhe shtypshkronja e saj.
Kaq vjet në tregun e botimeve pa asnjë abonim e pa asnjë përkrahje financiare, vetëm me mendimin për t’i shërbyer njerëzve që kanë diçka për të thënë.
Aktivitete e zhvilluara, botimet e saj tashmë cilësore kanë bërë që revista të vazhdojë të jetë një dritare informimi kulturor.
Projektet që ka për të ardhmen janë ambicioze dhe të mbështetura në përvojën e fituar.
Në përfundim dua të falenderoj të gjithë krijuesit, miqtë e revistës “Obelisk” dhe bashkëpunëtorët e saj.
Një falenderim familjes sime të mrekullueshme për mbështetjen e gjithanëshme që më ka dhënë.
Dua që në rrugën e nisur të kem përkrah miq të mirë!
Mirutakofshim në përvjetorë të tjerë!
Me respekt BOTUESI